Kashim Shettima, ya nemi afuwar iyalan waɗanda suka rasa rayukansu a wata mummunar harin saman da sojojin Najeriya suka kai a yankin ƙaramar hukumar Silame, Jihar Sokoto.

 Lamarin ya faru ne a ranar 25 ga Disamba, 2024, yayin da sojojin Najeriya suka kai hari kan sansanin da ake zargin na kungiyar ’yan ta’adda Lakurawa ne, a kauyukan Gidan Sama da Rumtuwa. Sai dai, an samu mummunan sakamakon da ya haifar da mutuwar fararen hula akalla 10.

A cikin wata sanarwa da mai magana da yawunsa, Stanley Nkwocha, ya fitar, Mataimakin Shugaban Ƙasa Shettima ya mika ta’aziyyarsa ga gwamnatin Jihar Sokoto da al’ummarta, musamman ga iyalan waɗanda abin ya shafa.

Ya bayyana damuwarsa sosai kan wannan al’amari, yana mai cewa:

"Dole mu ce mun yi nadama da bakin ciki kan mutuwar fararen hula da azabar da hakan ya jawo a wannan mawuyacin lokaci."

Shettima ya bayyana ƙalubalen da sojojin ke fuskanta wajen bambance ’yan ta’adda da fararen hula a yayin irin waɗannan hare-haren. Ya roki al’umma da su fahimci matsalar tare da ci gaba da bayar da haɗin kai ga sojoji, yana mai jaddada muhimmancin samun bayanai masu amfani daga jama’a domin gano inda ’yan ta’adda suke don guje wa aukuwar irin wannan mummunan lamari a gaba.

Ya tabbatar wa al’ummar Najeriya cewa gwamnatin Shugaban Ƙasa Bola Ahmed Tinubu za ta ci gaba da yin iya ƙoƙarinta wajen kawar da kungiyoyin ta’addanci da tabbatar da zaman lafiya mai dorewa a ƙasar.

Wannan lamarin ya jawo muhawara mai zafi kan bukatar inganta dabarun aikin soji domin kauce wa kashe fararen hula. Kungiyoyin kare hakkin bil’adama sun yi kira ga rundunar sojin Najeriya da ta sake duba tsare-tsarenta don hana irin wannan afkuwar a gaba.